हङकङबाट ४३ जना विद्यार्थीलाई शैक्षिक सामाग्री वितरण

उर्लाबारी ३ असार । उर्लाबारी – ९ स्थित प्रभात आधारभूत विद्यालयका ६,७ र ८ कक्षाका ४३ जना विद्यार्थीलाई विदेशबाट शैक्षिक समाग्री सहयोग आएको छ । उर्लाबारी – ९ खोपिडाँडा निवासी हाल हङकङमा रहेका जीवन पोमुले व्यक्तिगत सहयोग गर्नुभएको हो । शुक्रबार विद्यालयमा हुने साप्ताहिक अतिरिक्त कार्यक्रम अन्तरगत समय पारेर स्थानिय प्रतिनिधि सुरेन्द्र पोमुबाट शैक्षिक समाग्री वितरण गरिएको थियो ।

यसअघि जीवनले यस विद्यालयलाई ३ पटक सहयोग गरिसक्नुभएको छ । यसअघि शिक्षक प्रोत्साहन दस जना, अभिभावक प्रोत्साहन, विद्यार्थी प्रोत्साहन अन्तर्गत नेपाली, अंग्रेजी र गणित विषयमा ६० प्रतिशत ल्याउनेलाई विषयको पाँच सय रुपैया सहयोग दिँदै आउनुभएको छ । आर्थिक वर्ष २०७७÷०७८ मा स्थानिय दाजुभाइ खड्ग र पुर्ण चोङवाङले एक निजी शिक्षकलाई तलव दिनुभएको थियो भने यस वर्ष जीवन पोमु एक्लैले दुई जना निजि शिक्षकलाई तलव दिने निर्णय गर्नुभएको छ ।

सानो छदा यसै विद्यालयबाट औपचारिक शिक्षा लिएको स्मरण गर्दै जीवन आफू विदेशमा रहेर आफ्नो गाउँको स्कुल र अध्ययनरत विद्यार्थीलाई सकेको सहयोग गरि शिक्षित गाउँ, समाज र व्यक्ति निर्माण हुन्छ भन्ने हेतुले सहयोग गरेको हङकङबाट पोमुले जानकारी दिनुभयो। राष्ट्रिय शैक्षिक सुधार अन्तरगत सहयोगको आश्वासन देखाई हाल सम्म केहिपनि साथ, सहयोग नभएको दुखेसो विद्यालयका प्रधान्याध्यापक मोहन चापागाईंले गर्नुभयो।